Notícies

Navalni publica son primièr messatge e assegura que vòl tornar en Russia

L’opausant rus Alexei Navalni ven de publicar son primièr messatge public amb una fòto ont es acompanhat de sa familha. Ven de passar tres setmanas dins lo còma a causa d’un empoisonament per un agent nerviós. Dins lo messatge, publicat sus Instagram, ditz que pòt enfin respirar tot sol, çò qu’es una evolucion considerabla de son estat de santat.
 
Tanlèu garit, Navalni considèra de tornar en Russia, çò a dich als jornalistas. “Me sembla estranh que se pòsca pensar çò contrari”, çò a precisat, e mai siá lo segond còp que l’aurián intoxicat.
 
Navalni se tròba ara dins un espital de Berlin, ont los mètges an confirmat que patiguèt un empoisonament amb un agent nerviós dich Novitox, que lo govèrn alemand a remembrat que viòla grèvament la Convencion sus las Armas Quimicas. Mas Russia afortís totjorn que trobèron pas cap de substància quimica dins lo còrs de Navalni quand foguèt espitalizat en Sibèria abans d’èsser transportat devèrs la capitala alemanda.
 
De remarcar que lo Novitox es tanben la substància qu’intoxiquèt l’èx-espion rus Sergei Skripal.
 
 
Un aterratge d’emergéncia
 
Lo 20 d’agost passat, Alexei Navalni èra espitalizat en Siberia dins lo còma en seguida de son empoisonament. Tornava en avion de Moscòu, comencèt de se sentir mal e l’avion deguèt far un aterratge d’emergéncia a Omsk. Sospièchan que l’intoxicacion li venguèt dins un tè que prenguèt a l’aeropòrt de Tomsk, abans de prene l’avion. Tanlèu que los mètges russes aguèron assegurat que i aviá pas d’indicis d’empoisonament, la familha demandèt que lo transferiguèsson devèrs un espital de Berlin ont se tròba dempuèi 18 jorns.
 
 
Probable empoisonament fa un an
 
Fa un an, foguèt espitalizat per una allergia mentre qu’èra en preson. Alavetz, sa portavotz expausèt ja la paur de l’empoisonament car Navalni aviá pas jamai agut cap de reaccion allergica.
 
A aquel moment, Navalni e mai d’un milièr de personas foguèron encarcerats pendent un mes per aver promogut una manifestacion dins la quala aperaquí 20 000 personas avián protestat contra lo conselh electoral rus: d’efièch, aqueste aviá enebit divèrsas candidaturas d’oposicion a las eleccions legislativas. Tanben en 2017 l’avián arrestat a el e un centenat de manifestants que denónciavan la corrupcion del Kremlin.
 
Alexei Navalni es un activista anticorrupcion conegut. Es vengut l’opausant pus critic e ferme a Vladimir Putin. L’an arrestat mai d’un còp per sa dissidéncia politica e sa militància.


 
          View this post on Instagram                  

Привет, это Навальный. Скучаю по вам . Я все ещё почти ничего не умею, но вот вчера смог целый день дышать сам. Вообще сам. Никакой посторонней помощи, даже простейший вентиль в горле не использовал. Очень понравилось. Удивительный, недооценённый многими процесс. Рекомендую

A post shared by Алексей Навальный (@navalny) on Sep 15, 2020 at 2:38am PDT






 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies