Notícies

Ortès: commemoraràn l’independéncia de Bearn

Lo 25 de setembre, commemoraràn a Ortès lo jorn d’independéncia de Bearn, en remembre de la proclamacion que la faguèt Gaston Fèbus en aquela vila, lo 25 de setembre de 1347, en refusar d’ajudar lo rei de França dins sa guèrra contra l’armada d’Anglatèrra. D’efièch, a 18h30 a la Tor Moncada, lo Front Popular per la Republica Occitana (FPRO) farà un parladís sus aquel eveniment istoric e puèi se cantarà e se partejarà lo veire de l’amistat.
 
L’FPRO convida la populacion, tant de Bearn coma de tota Occitània, a aquela commemoracion de “l’istòria nosta” qu’es pas dins “l’istòria oficiau francesa ensenhada”.
 
“Uei enqüèra, la França que demanda a las nacions shens estat qu’invadó de seguir-la en las soas guèrras imperialistas mondializadas. Uei, los gascons n’avem pas mei un prince qui’ns poderé tirar d’aquera carrèra bòrnia capitalista impausada per l’estat francés e los sons partenaris deu G7”, çò ditz l’FPRO dins sa crida a participar a l’eveniment.
 
 
Declaracion d’independéncia
 
Lo 25 de setembre de 1347, a Ortés, lo comte Gaston III dich Fèbus recebiá un representant del senescal de Roergue, que li demandava d’anar luchar al costat del rei de França contra Anglatèrra. Per evitar lo conflicte, lo jove Gaston Fèbus d’alavetz balhèt una responsa per escrich ont declarava Bearn tèrra nèutra d’aquel conflicte en tot refusar de plegar lo genolh davant lo rei francés. Aquel fach es considerat coma una declaracion d’independéncia que desliurèt los bearneses per un temps de la Guèrra de Cent Ans.
 
L’FPRO cèrca de recuperar l’istòria del país non ensenhada e amagada, per tal que “la nacion occitana” se pòsca un jorn “prononciar per l’autodeterminacion deu noste pòble”.

 
 
 


 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies