Notícies

Pau: un militant occitanista agarrit mentre que fasiá campanha per Mélenchon

Lo militant occitanista Alain Berit-Debat se faguèt agarrir dimarts passat dins lo centre de Pau mentre que fasiá campanha pel movement politic nomenat França Insomesa que presenta per candidat Jean-Luc Mélenchon. Berit-Debat recebèt un còp de cotèl dins la cuèissa, çò rapòrta La République des Pyrenées.
 
Retirat de 67 ans, Alain Berit-Debat es conegut dins l’occitanisme per son activisme amb lo movement occitanista revolucionari Libertat dempuèi l’epòca d’Anaram au Patac. Son accion politica se ten mai que mai dins lo quartièr del Hedars de Pau, qu’es ont se faguèt precisament agarrir. “Que marchavi dab ma bicicleta e que discutivi dab gents entà explicar lo vòte Mélenchon”, çò explica Alain. “Tot que sigó hèra rapid. Que sigoi honhat hens l’esquia, qu’entenoi cridar «insomés de...», que prengoi un còp hens la cuèisha e que tombèi coma un sac”, çò precisa totjorn segon La République des Pyrenées. Ferit sens tròp de gravetat, Berit-Debat faguèt sa denóncia dimècres al comissariat de Pau.
 
S’agís pas de la primièra agression patida dins l’encastre de la campanha electorala. Segon la candidata de França Insomesa dins la primièra circonscripcion, Severine Ghedjati, los activistas del movement de l’esquèrra jacobina an raportat “plusors faches d’agression”.
 
Uèi, darrièr jorn de campanha, los militants melenchonistas se passejaràn per gros de dos dins lo centre de Pau, amb de ponches d’aperitiu, “entà arrescontrar las gents hens lo partatge e la bona umor”. Aquel  movement a fach una campanha revolucionària en emplegant las nòvas tecnologias e en fasent de discorses simultanèus amb d’ologramas. Lo candidat èx-trotskista e èx-socialista cèrca lo vòte dels electors socialistas e ecologistas decebuts.
 




Leave a Reply

Your email address will not be published. Required fields are marked *