Notícies

Perqué los oragans daissan a pena de damatges en Cuba?

Los mèdias rapòrtan los damatges e las tragèdias que cada an, a aquela epòca de fin d’estiu, los daissan cèrts oragans dins los païses de la mar Cariba. Los damatges provocats als Estats Units per Harvey, e ara la vesita de Macron dins l’illa de Saint Martin per reconfortar los sinistrats d’Irma. Mas la question que nos pausam a la redaccion es perqué aquelas tempestassas provòcan tan pauc de mòrts e de damatges en Cuba?
 
En 2016, l’oragan Matthew daissèt de desenats de mòrts als Estats Units e de centenats dins las autras illas de la mar de las Antilhas, en Cuba i aguèt pas cap de mòrt. La Defensa Civila cubana demostrèt tornarmai son eficacitat. Ara, lo passatge d’Irma, qu’a provocat de degalhs serioses a las Antilhas francesas e en Florida, a a pena daissat de mòrts e de nafrats en Cuba, malgrat las inondacions que las an patidas de vilas cubanas, quitament l’Avana. La clau del succès es la solidaritat, çò rapòrta Público. Quand un tempèri menaça l’illa, s’activa la Defensa Civila cubana, compausada d’abitants de l’illa.
 
La Defensa Civila cubana es una estructura enòrma que va de la direccion nacionala fins a cada comuna de l’illa. Lo 90% de sos efectius son de ciutadans cubans, qu’an lors mestièrs e emplecs, mas quand i a una alèrta de tempèsta, se consagran unicament a la proteccion civila jols òrdres dels caps nacionals, provincials, municipals e zonals.
 
La primièra fasa de lor trabalh es l’informativa. A aquel moment totes los mèdias consagran de longs espacis informatius a raportar al detalh a totes los ciutadans totas las caracteristicas de l’oragan qu’arriba. Dins la segonda fasa s’amainatja tot lo territòri e se prepara la populacion per que l’impacte de l’oragan siá lo mens devastaire possible. La tresena fasa es la d’alarma.
 
Long del sègle XXI an tocat Cuba mai d’una quinzena d’oragans, amb un bilanç de 40 mòrts e de damatges per la valor de 20 miliards d’èuros qu’an concernit 1,5 milions d’ostals. La Defensa Civila cubana, e son estructura solidària, an reüssit qu’aquel bilanç siá pus naut. Mentretant sèm a esperar l’avaloracion del passatge d’Irma. 
 



 

Leave a Reply

Your email address will not be published. Required fields are marked *