Notícies

Presonièrs politics catalans: lo jutge manten empresonats los dos Jordis, Junqueras e Forn

Lo jutge a decidit aqueste diluns de manténer embarrats lo vicepresident de la Generalitat de Catalonha, Oriol Junqueras, lo ministre de l’Interior Joaquim Forn e los dos presidents de las associacions independentistas Jordi Cuixart e Jordi Sànchez. Los autres ministres inculpats, Dolors Bassa, Meritxell Borràs, Carles Mundó, Raül Romeva, Josep Rull e Jordi Turull, an pogut quitar la preson en pagant cadun una caucion de 100 000 èuros. Tanlèu conéisser la decision del jutge, las associacions independentistas avián anonciat que la caissa de resisténcia aviá amassat pro d'argent per pagar aquelas caucions.
 
Los presonièrs politics catalans foguèron entenduts pel jutge divendres passat a lor demanda, car ara es la Cort Suprèma qu'a reclamat l'afar a l'Audiéncia Nacionala, lo tribunal d'excepcion que se trachava de la procedura. Totes son acusats de sedicion e rebellion e riscan una pena de 30 ans de preson.
 
Lo vicepresident Oriol Junqueras e los sèt ministres èran empresonats dempuèi lo 2 de novembre passat, mentre que los presidents de l'Assemblada Nacionala Catalana e d’Òmnium, Jordi Sánchez e Jordi Cuixart, son encarcerats dempuèi lo 16 d'octòbre.
 
Lo ministèri public e l'acusacion particulara realizada pel partit ultradrechista Vox demandavan que foguèsson totes mantenguts en preson car consideravan que i aviá risc de fugida, de destruccion de pròvas e reïteracion del delicte.
 
La decision del jutge va condicionar, de tot segur, la campanha electorala de las eleccions al Parlament de Catalona previstas pel 21 de decembre qu’es començada aquesta nuèch. Aquelas eleccions se debanaràn amb lo govèrn de la Generalitat destituit per l’estat espanhòl e qualques-unes de sos membres en preson o en exili.





 
 

Leave a Reply

Your email address will not be published. Required fields are marked *