Notícies

Rius de Menerbés: una escòla bèla per la Calandreta Los Cascamèls

Aprèp un primièr local dins un domeni viticòla, un passatge per Traussan e una locacion dins un ancian restaurant a la dintrada de Peiriac de Menerbés, la Calandreta Los Cascamèls desira de se mudar a Rius de Menerbés e fa una crida al finançament participatiu dobèrt “a las familhas, als pairins e mairinas, als amics, als amics d’amics, als amics d’amics d’amics, als vesins e vesinas, als aujòls, als occitanistas, als inconeguts e inconegudas e a qual voldrà…”:
 
L’associacion explica atal lo perqué d’aquesta demanda:  
“Nòstra pichona escòla rurala de Menerbés (de mai en mai granda) va faire un pas importanta aprèp 9 ans d’existéncia e 3 ans de contractualizacion amb l’Educacion Nacionala: la crompa de locals a Rius de Menerbés!
 
Aprèp fòrça discussions, sèm passats a l’accion: de recèrcas, de vesitas, un luòc que nos agrada, mas cal passar de centenats d’oras a trabalhar, negociar, dessenhar, imaginar, cobastir lo luòc e passar de temps a passar e repassar las chifras, rescontrar de partenaris, convéncer las bancas, afrontar de refuses, reçaupre de sostens e encoratjaments e, enfin, i sèm!
 
S’agís de crompar un ancian Centre d’Ajuda pel Trabalh (CAT) dins un grand pargue de verdura, amb l’accès a pè al gimnasi, a l’estadi e a la piscina ade al comuna, fàcia al collègi. Un bastiment de 320 m² que comptarà 3 salas de classa de 60 m² e mai, un refectòri, una sala per dormir e un grand garatge sus una pèça arborada de 1800 m² que permetràn d’activitats pedagogicas.
 
Un estapa necessària pels 45 escolans actuals (e deman: 60) qu’an fait la causida de la lenga nòstra, d’una pedagogia alternativa, amb la tòca d’aprene e de s’espompir dins nòstra lenga e nòstra cultura.”  
En mai d’aquò, en ligason amb l’associacion Lo Rossinholet, la Calandreta Los Cascamèls obrarà a un projècte bèl de pòl cultural occitan amb d’associacions partenàrias.
 
Alara, per sosténer l’iniciativa e lo projècte, se pòt faire un don en moneda: o prene part a l’aventura en crompant segon vòstres mejans de presents (ceramicas, comun o lavamans per enfant, pòrta colorada, pintura –dins las nòrmas que cal–, rampa d’accès per andicapat, aiguièr d’inòx, burèus pichons, taulas de cantina etc.):
 
 
Un dinnar estelat pels Cascamèls
 
L’associacion pren tanben d’autras iniciativas per trapar de sòus. Atal, aqueste dimenge 18 de novembre, organiza un dinnar bèl al castèl de Vilaulin (Cabardés) a comptar de 11 oras e mièja del matin, repais preparat pel cap estelat del restaurant La Barbacana a l’Ostalariá de Ciutat a Carcassona: Jiròni Ryon (que sos dos enfants foguèron calandrons a Carcassona). Una taulejada que serà animada musicalament per Laurenç Cavalièr a 65 € la participacion (blanqueta, dintrada, plat, formatge, doçor, vins e cafè). Mèfi: lo nombre de plaças es limitat. Inscripcions: 07 82 29 88 97
 
Per e-mail: loscascamels@gm.... Òm se pòt recampar que las taulas son de dètz personas.
 
 
 
 
Alan Roch
 
 





 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies