Notícies

Rugbi de XIII: cada segonda compta…

Superliga: cachavièlha a Brutus
 
Los Dragons an passat 80 minutas a córrer darrièr Hull FC. Darrièra minuta: Kasiano marca l’ensag que Tomkins transforma; 30-28 pels catalans. Quatre pichonas segondas de jòc encara. Sul remandadís, un catalan dintra dins la zòna dels 10 mètres. Penalitat que Sneyd ensaca dels 50 mètres. Egalitat 30-30 e punt en aur a venir. Recepcion mancada pels catalans, mesclanha e Sneyd passa lo tombat de la victòria anglesa: 31-30.
 
La dimenjada de Pascas arriba amb un desplaçament a Londres dijòus e la recepcion de Castleford diluns: demòra als catalans de tornar trapar los camins de la victòria.
 
Saint Helens a représ sa marcha endavant: victòria 38-12 suls Lops de Warringon, alara que Wakefield domina Wigan: 20-12.
 
 
Elèit 1: Carcassona cap de fila
 
En Elèit 1, se debanava la Dimenjada Magica a Carcassona, revista de las dètz formacions abans la fin de sason.
 
Tolosa marquèt tres ensages dins las darrièras dètz minutas, mas èra tròp tard: victòria d’Avinhon 32-30. Palau se mostrèt mai actiu que Sent Gaudenç per ganhar 42-24. Lo dèrbi audenc metèt de temps per causir son venceire: victòria de Lesinhan sus Limós: 18-14.
 
Dimenge, Vilanòva faguèt la melhora entama, mas Albi accelerèt per ganhar 52-24. Los dos primadièrs s’afrontavan. Entre Carcassona e Dragonets, la partida foguèt de naut nivèl. Los audencs capitèron d’arrestar los assauts de la fòrta linha de davants catalana e las cambas de fuòc de sos atacants permetèron a Carcassona de ganhar 30-22 e de prene la primièra plaça al classament un punt davant Lesinhan e dos davant los catalans.
 
Dimenge, Lesinhan reçauprà los Dragonets alara que Carcassona jogarà a Albi aqueste dissabte de ser.
 
 
Finala catalana en Copa d’Elèit 2
 
Las mièjas finalas del Challenge Aillères, la Copa d’Elèit 2, virèron a l’avantatge de las formacions catalanas: Pià dominèt Vilafranca de Roergue: 34-12 e Baó ganhèt l’afrontament bèl amb Vilagalhenc-Argon: 23-16.
 
 
Cameron Smith, rei de l’NRL
 
En passant doas penalitats contra los Vaquièrs, Cameron Smith ven lo jogaire qu’a marcat lo mai de punts en NRL. 2422 punts e la tièra es pas acabada…
 
 
 
 
 
Alan Roch
 




 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies