Notícies

Rugbi de XIII: la Superliga s’expòrta

La partida de Superliga entre Wigan e Hull FC s’es jogada a 17 000 km d’Anglatèrra: sus la pelena dels Dragons de St Jòrdi a Sydney. Partida ganhada per Wigan: 24-10. Se parla tanben de faire jogar Catalans-Salford a New York. La deslocalizacion ganha ara lo monde tretzista.
 
 
Los Dragons an de trabalh!
 
Divendres al ser, bona novèla pels Dragons Catalans: aprenián que lo Conselh d’Estat levava la suspension de dos ans (per un contraròtle… negatiu) de lor arrièr Tony Gigot que deuriá rejónher l’efectiu al mai lèu.
 
Dissabte, los Sang e Aur prenguèron a Brutus una leiçon de realisme. St Helens anèt pas fins al tèrme de la primièra cadena de tenguts, vist que Lomax puntava un ensag tre la primièra minuta. Los catalans dominavan, mas son los angleses que marcavan (12-0 a la pausa).
 
A la represa, Mead s’escapava darrièr lo tengut per marcar pels Sang e Aur; mas fòrça demorariá fin finala als angleses: 21-12. E pels catalans s’anóncia un desplaçament malaisit per dijòus a Hull KR, una autra formacion qu’a pas encara ganhat tanpauc aprèp sa desfaita a Leeds: 20-11. Segonda desfaita encara per Warrington batut 20-6 a Huddersfield. Divendres, Wakefield resistiguèt al retorn de Salford 14-12. Dimenge, Castleford gardèt l’avantage sus Widnes: 13-12.
 
En Championship, desfaita de Tolosa a Featherstone 36-18 abans la recepcion de las Aglas de Sheffield aqueste dissabte 17 a 5 oras del vèspre a Blanhac.
 
 
Qual serà campion del Mond dels clubs?
 
Aqueste divendres, en Austràlia, la Tempèsta de Melbourne e Leeds se disputaràn lo títol de melhor club de la planeta tretzista. Una confrontacion ont los europèus an l’avantatge d’aver entamenada la competicion alara que los australians son en fasa de preparacion pel campionat NRL que reprendrà a la debuta de març.
 
Dos autres afrontaments intercontinentals e amicals se tendràn: Rabbitohs-Wigan dissabte e St George-Hull FC dimenge.
 
 
Fins a la darrièra minuta
 
Lo campionat d’Elèit 1 foguèt perturbat pel maissant temps: los afrontaments entre Avinhon e Vilanòva e entre Tolosa e Limós son remeses al mes de març.
 
Dissabte, manquèt la capitada de la transformacion a tres minutas de la fin als Tigres d’Albi que daissèron la victòria a Lesinhan 25-24.
 
Dimenge, un ensag de Sigismeau a doas minutas del tèrme balhèt la victòria als catalans de Palau sus una esquipa de Carcassona pas tròp flama per l’ora: 30-26. Los Dragonets, eles, se passegèron fàcia a Sent Gaudenç: 54-12.
 
 
Los 1/8 ns de la Copa
 
La dimenjada qu’arriba serà consacrada als 1/8ns de la Copa. Lo tenent, Carcassona, reçauprà los Bròncos de Tolosa e ensajarà de sortir de l’espirala de la desfaita.
 
Las autras 7 formacions d’Elèit 1 jogaràn cò de lor adversari e deurián passar aqueste torn: St Esteve-XIII Catalan cò del vesin Illa de Tet, Lesinhan a Salsas, Avinhon a Ferrals, Palau a Selon, Albi a Trentels, Limós a Caumont e, dissabte de vèspre, Sent Gaudenç en Cabardés contra Vilagalhenc-Argon.
 
 
 
 
Alan Roch

 
 



 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies