Notícies

Rugbi de XIII: rendètz-vos bèl del XIII aqueste dissabte 18 a l’estadi Domèc de Carcassona

Abans de vos presentar l’afrontament entre Dragons Catalans e Tolosa Olimpic, programat aqueste dissabte de vèspre a l’estadi Domèc de Carcassona, cal mandar un còp d’uèlh sul debanament dels 16ns de finala de la Copa Lòrd-Derby.

A Dama Copa li agrada pas gaire las suspresas
 
Qualques partidas foguèron desequilibradas: Lesinhan passèt un 116-2 als Lops d’Aspet; Illa Tet ganhèt 76-0 a Vilanòva de Menerbés. St Gaudenç s’impausèt a Gratentor: 84-6, Vilafranca a Tonens: 52-12 e Albi a Ramonvila: 56 -16. Una setmana aprèp la victòria en campionat, Carcassona tornèt ganhar a Tolosa 60-6.
 
D’autras resistiguèron un brave moment abans de plegar: Vilagalhenc-Argon metèt una brava mièja ora per prene la mesura de Caurs: 60-14; sa resèrva resistiguèt a l’Escura 18-34. Ferrals menava 13-0 a la pausa abans de pèrdre 13-26 fàcia a Baó. Pià se permet de menar 20-18 a la pausa contra los Dragonets abans de s’inclinar 26-50. Doas formacions s’inclinèron de dos punts fàcia a d’esquipas d’un nivèl superior: es lo cas de doas esquipas de Federala que recebián de pensionaris de l’Elèit 2: lo Tòr pèrd 18-20 contra Selon e Pàmias s’inclina 30-32 fàcia a Entraigas.
 
Logicament, Tolon eliminèt Lion 28-8. Palau relança sa sason mercé a un segond temps de tria en eliminant Avinhon: 50-28. Dins la partida cap d’aficha d’aqueste torn de Copa, Limós se sortís de las urpas dels Leupards de Vilanòva: 24-18.
 
Fin finala, lo Pichon Pocet dels 8ns serà Realmont (Nacionala 1) qu’elimina Carpentràs (Elèit 2): 16-12.
 
 
Jornada de ratrapatge
 
Aquesta dimenjada 19, lo calendièr d’Elèit 1 se metrà a jorn en particular amb los rescontres Albi-Vilanòva dissabte 18 e Avinhon-Carcassona, dimenge 19.
 
La partida Tolosa-St Gaudenç, que se tenguèt pas per la Dimenjada Magica de debuta de sason, se debanarà dimenge de vèspre a Pàmias.
 
 
Partida de preparacion a Carcassona
 
Coma o expliquèt Steve McNamara, l’entraïnaire dels Dragons catalans, a la conferéncia de premsa de dijòus passat a la comuna de Carcassona, las doas formacions de Perpinhan e Tolosa se refusan a faire de despensas per anar jogar de partidas amicalas de presason en Anglatèrra. Per faire una revista d’efectiu abans la represa en Superliga e en Championship dins una quinzenada, lor demòra l’afrontament d’aqueste dissabte 18 de genièr, a 4 oras e mièja del vèspre dins l’estadi Domèc de Carcassona. L’arbitre anglés James Child serà al fiulet.
 
Las 2 formacions anoncièron que farián jogar lors novèls jogaires e que la descobèrta de las novèlas composicions deuriá permetre d’emplenar las tribunas de l’estadi emblematic de la disciplina.

 
 
 
 
Alan Roch
 
 
 
 
 

 
 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies