Notícies

Rugbi XIII, Copa: los Molinièrs enfarinan los Dragonets

Una granda vesprada tretzista
 
La prima senhorejava aqueste dissabte a Carcassona ont 5 000 espectators e espectatrises se ramosèron per seguir las finalas de las Copas.
 
Pels juniors, en Copa Nitard, los locals de l’AE Carcassona pensèron d’aver fait lo mai gròs per la conquista del trofèu quand menèron 30-20 a dètz minutas de la fin. E aquí la paur de ganhar, l’enveja de jogar la mòstra los faguèt desjogar. Los joves provençals de l’EO Avinhon ne profeitèron per puntar dos ensages, los dos transformats, e tornar partir delà Ròse amb lo trofèu: 32-30.
 
La finala de la Copa Lord Derby èra una oposicion occitanocatalana entre Lesinhan e los Dragonets de Sant Estève-XIII Catalan. Lo pilar catalan Springer cargava d’un biais elefantesc e traucava sus 70 mètres per marcar un plan bèl ensag. Lesinhan passava una penalitat, mas lo mesclanha Robin èra a la recuperacion d’un còp de pè de son dobertura Jofret: 12-2. Lesinhan passava una novèla penalitat, Farlow èra a la recepcion d’una candela ensolelhada e Grandjean i anava d’un tombat just abans la pausa: 12-11 pels catalans.
 
A la represa, Robin marcava un segond ensag, Miloudi serpentejava dins una defensa audenca atupida, puèi rajustava un tombat. Aprèp un quart d’ora dins lo segond temps, la messa èra dita: los catalans menavan 25-11, los Verds e Blancs èran suls genolhs. Mas los Singlars de las Corbièras refusan totjorn d’acabar bolhits en ollada! E en uèit minutas e tres ensages, los occitans anavan, a la suspresa generala, capvirar la situacion: primièr per Jackson en cap de linha, puèi sus l’autra ala per Poggi en sortida de mesclanha abans que Bozinac s’escapèsse de darrièr un tengut per s’espatarrar entre los pals. Amb las transformacions, pel primièr còp de la vesprada, los Molinièrs prenián l’avantatge a la 73a minuta, 27-25, e lo gardavan fins a la còrna. La volontat d’un grop aviá pres lo pas sus la joinesa e lo vam catalans.
 
 
Pasquetas poiridas pels Dracs
 
La setmana passada, parlèrem de Pascas floridas pels Dracs. Aqueste còp, vos entretendrem de Pasquetas poiridas aval del costat de Wigan. Jos la pluèja, los Sang e Aur prepausèron un festenal de fautas de man; Palà e Monís sortiguèron nafrats; lo ritme anglés estofèt los catalans: 16-0 a la pausa; 34-0 a la fin. Uèit ensages encaissats. Gaug encara qu’una sola transformacion foguèsse encapada! Los Dracs demòran en oitena posicion e auràn un desplaçament tornarmai complicat a Huddersfield aqueste dissabte: los Gigants, qu’an perdut sus lor pelena 11-8 fàcia a St. Helens, son just darrièr los Dracs al classament.
 
Dins aquesta desena jornada, notarem lo carton de Warrington fàcia a Wakefield 80-0 e la victòria dels caps de fila de Leeds 28-18 a Salford.
 
Los Dracs tanben an aprés que lor segonda linha Whitehead-Capblanc partiriá per l’NRL la sason venenta. Que volètz? Cèrtas setmanas, son atal!
 
 
Una victòria pels U16
 
L’esquipa de França dels U16 (los cabdèths, qué!) faguèt una corta virada en Anglatèrra: una desfaita 16-6 a Wakefield lo divendres 3 d’abril; una victòria a Featherstone dimars 7: 20-8 amb un ensag e quatre transformacions pel dobertura Lucàs Albèrt, designat òme de la partida. Coma qué, lo fait d’èsser calandron dobrís de perspectivas esportivas. Los joves se ganhèron en mai d’aquò un retorn de Londres en autocar en rason d’una cauma dels contrarotlaires aerians. Los viatges forman la joinesa!
 
 
L’ensag de la setmana
 
Aquel del mesclanha dels Broncos de Brisbane, Ben Hunt, marcat dins la prolongacion (punt d’aur). De costuma, s’espèra totjorn de ben capitar un tombat. Aquí, lo mesclanha trauca la defensa dels Sydney Roosters per balhar la victòria a son esquipa 22-18.
 
 
Los quarts del campionat
 
Aquesta dimenjada, plaça als quarts del campionat d’Elèit amb los rescontres Carcassona-Avinhon (dissabte, 17h30) e Lesinhan-Limós (dimenge). Se jogaràn tanben las mièjas finalas dels juniors amb las partidas Limós-Carcassona e Avinhon-Sant Estève.
 
 
En occitan se vos plai!
 
La Federacion m’aviá fisat l’animacion sonorizacion de la Finala de la Copa a Domèc. De segur, coma Lesinhan e los catalans jogavan, aquela activitat la menèri en tres lengas: francés, occitan e catalan. Francament, se los occitanistas volián e fasián en sòrta d’èsser dins la vida vidanta de lor vila, i a un fum de causas simplassas de faire (aquí s’agís de parlar dins un microfòn) per que l’occitan siá present dins la vida publica —e sens besonh de lei, mas amb lo biais e la volontat—!
 
 
 
 
Alan Roch

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies