Notícies

Segond confinament dins tot lo país, franc d’Aran e de las Valadas

Tota Occitània, franc d’Aran e de las Valadas (per ara), se deu reconfinar a partir de deman a mièjanuèch, o anoncièt ièr de ser lo president francés, Emmanuel Macron, dins una seguida de mesuras de lucha contra la covid-19. Lo segond confinament de l’estat francés es mens estricte que lo de la prima, e mai Macron diguèsse que la situacion ara es pièger.
 
Son dobèrtas las escòlas, los collègis, los licèus e las grèpias amb un refortiment dels protocòls sanitaris. Tanben son dobèrts los cementèris per Martror e los comèrcis essencials, e se permetrà las vesitas dins las residéncias d’ancians. Per contra, las universitats son tampadas e foncionan a distància. Los comèrcis considerats coma non essencials, ansin coma los bars e restaurants, son barrats e se permet pas la mobilitat entre regions. A mai, França daissa barradas las frontièras exterioras a l’UE, mentre que demòran dobèrtas las de l’espaci Schengen.
 
La tòca es d’evitar lo pic de la prima passada dins los servicis de reanimacion dels espitals, que dins las circonstàncias actualas èra previst dins los 15 jorns avenidors. Uèi, lo primièr ministre, Jean Castex, detalharà las anóncias presidencialas davant las doas cambras del parlament.
 
 
En pensant a l’economia e a Nadal
 
Lo confinament èra la mesura que la voliá lo ministre de la santat e, de fach, los mètges. Ça que la, los ministres de l’Interior e de l’economia preferissián d’avançar lo cobrifuòc, qu’ara es de 21h a 6h.
 
Lo govèrn de Castex crei que lo nòu confinament faga tombar lo PIB d’un 2% o 2,5%. Per aquela rason, Macron diguèt dins son discors de ièr de ser que l’economia “se deu pas arrestar ni enfonzar”. Lo president francés reconeguèt la dificultat de la situacion e afortiguèt que gardava “l’espèr de celebrar en familha Nadal e las fèstas de fin d’annada”.
 
 

Adresse aux Français. https://t.co/0ODYwPMAbF

— Emmanuel Macron (@EmmanuelMacron) October 28, 2020




 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies