Notícies Notícies de Govèrn

Tres joeni aranesi comencen a trabalhar en Conselh Generau d’Aran damb eth programa Garantia Juvenil

Vielha, 5 de deseme de 2017.- Tres joeni aranesi s’an incorporat mejançant un contracte de practiques de 6 mesi ara estructura deth Conselh Generau d’Aran, dempús d’auer-se acuelhut ath programa Garantia Juvenil. Es gojats e gojates trabalharàn enes departaments de Secretaria e Recorsi Umans; Informatica; e Miei ambient ena Gestion de Residus.

Encara i a era possibilitat qu’un quatau joen se pogue incorporar coma Auxiliar d’Informacion Toristica. Es interessadi/des s’an d’informar en burèu de Joenessa deth Conselh Generau d’Aran en C/Major, 36 de Vielha.

A trauès des programes Garantia Juvenil, eth Conselh Generau d’Aran a contractat ueit joeni enes dus darrèri ans, atau com a explicat eth vicesindic d’Aran e conselhèr de Joenessa, Luís Carlos Medina, qu’a trabalhat intensaments pendent aguest temps amassa damb es responsables de Garantia Juvenil dera Generalitat de Catalonha, entà qué es joeni aranesi cada còp coneishquen mès totes es possibilitats que les aufrissen aguesti programes e se’n poguen beneficiar.

Eth programa Garantia Juvenil ei ua iniciatiua europèa d’aucupacion entà redusir eth caumatge juvenil, impulsada en Catalonha a trauès deth Servici Public d’Aucupacion de Catalonha (SOC), e ena Val d’Aran era collaboracion damb eth Conselh Generau d’Aran a trauès deth Departament de Joenessa.

Per çò qu’ei deth sector tecnologic, qu’a grana projeccion de futur, damb era Garantia Juvenil, mercés a un convèni damb importantes enterpreses tecnologiques en Catalonha, s’an amiat a tèrme iniciatiues coma corsi de conduccion de drons o entà Javascript e Angular e de Programacion Tecnica entà Android e iOS. Es joeni aranesi interessadi en aguest encastre pòden demanar mès informacion en burèu de Joenessa.

Tanben cau saber que LNT Mobility permet hèr practiques per un temps minim de 2 mesi en quinsevolh país dera Union Europèa ena enterpresa publica e privada qu’an de besonh personau format enes especialitats d’aguest programa. Es joeni seleccionadi arreceberàn preparacion prèvia ath sojorn en estrangèr e se les susvelharà ath long des practiques.

Entà accedir as programes de Garantia Juvenil cau auer entre 16 e 29 ans, e complir es requisits següents http://garantiajuvenil.gencat.cat/ca/que-es-garantia-juvenil/Requisits/

 

Entà mès informacion http://garantiajuvenil.gencat.cat/ca/inici/

 

Leave a Reply

Your email address will not be published. Required fields are marked *