Notícies

Una delegacion valenciana al Parlament d’Estrasborg

Escola Valenciana (“Escòla Valenciana” en occitan) es una federacion valenciana d’associacions per la lenga. Creada oficialament en 1990, multiplica las accions per que lo valencian, çò es lo catalan parlat al País Valencian, non sonque siá la lenga veïculara de l’ensenhament, mas per que tanben se faga servir normalament dins tota la societat valenciana.
 
 
De dreches lingüistics mespresats
 
Lo 22 de febrièr passat, lo ridicul vergonhable de la consolessa de Valéncia, Rita Barberá, incapabla d’exprimir en public qualques frasas simplòtas en catalan, mostrèt la dificultat sociala d’aquela lenga, victima del mesprètz politic malgrat sa cooficialitat dins aquela comunautat autonòma. En mai d’aquò, lo govèrn PP (drecha espanhòla), al poder al País Valencian, entrepacha lo desvolopament de l’ensenhament immersiu en catalan, e ansin mai de 100 000 escolans son discriminats, obligats de seguir una escolarizacion en espanhòl, malgrat la volontat de lors familhas. Tanben es important de recordar que lo govèrn valencian interditz l’accès a la cadena catalana TV3 e barrèt arbitràriament RTVV (Ràdio-Television Valenciana) en novembre de 2013.
 
 
46 milions d’europèus parlan una lenga minorizada
 
Per aiçò, dijòus de 12 març, dos delegats d’Escòla Valenciana, Jaume Fullana e Emili Gascó, anèron al Parlament Europèu d’Estrasborg per demandar la proteccion de l’Union Europèa, non sonque pels catalanofòns mas tanben per l’ensems dels ciutadans de l’UE que parlan una lenga minorizada, valent a dire pauc o pas brica protegida. Los occitanofòns e los autres europèus seriam aperaquí 46 milions que podèm pas exercir liurament lo drech de practicar nòstras lengas respectivas e d’i accedir.
 
Una Directiva per las Lengas Europèas Regionalas?
 
Jaume Fullana e Emili Gascó parlèron amb l’Intergrop de las Minoritats Tradicionalas, Comunautas Nacionalas e Lengas del Parlament Europèu. Lo presidisson l’ongresa Kinga Gál (Partit Popular Europèu), lo finlandés de lenga suedesa Nils Torvalds (Aliança dels Liberals e dels Democratas per Euròpa) e lo valencian Jordi Sebastià (Los Verds-Aliança Liura Europèa). Los dos representants d’Escòla Valenciana, en tot expausar als eurodeputats la situacion complicada dels 10 milions d’europèus de lenga catalana, i prepausèron que se decidiguèsse dins l’Union Europèa una Directiva per las Lengas Europèas Regionalas, per fin que se garentiguèsse que los locutors de lengas oficialas e los de lengas minorizadas aguèsson exactament los meteisses dreches lingüistics. Per Escòla Valenciana, los dreches lingüistics son tanben de dreches umans.
 
Mentre que los partits politics franceses refusan encara de complir las promessas electoralas de votar una lei que protegisca eficaçament l’occitan e las autras lengas minorizadas, podèm esperar de l’Union Europèa qu’apare nòstres dreches?

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies