Notícies

Ven de se publicar lo Manifèst de Tolosa, en sosten a Catalonha

Ven de se publicar lo dich Manifèst de Tolosa, en sosten a Catalonha. Lo manifèst  "per la democracia en vista de la situacion actuala en Catalonha" demanda a cada deputat europèu d'agir en son arma e consciéncia per defendre los dreches de l'òme e lo drech d'autodeterminacion dels pòbles inscriches dins la Constitucion europèa".
 
L'an publicat en seguida de la manifestacion que la visquèt Tolosa dissabte passat per la liberacion dels presonièrs politics catalans. Publicat sus Change.org, lo manifèst a atench mai de tres mila adesions.
 
La declaracion planh la situacion actuala en Catalonha en vista "de la repression violenta viscuda pel pòble catalan, l'empresonament del vicepresident e de 7 membres del govèrn elegits e de doas personalitats de la societat civila, de l'interdiccion de manifestacion pacifica dins tota Espanha, del mandat d'arrèst internacional illegal [...]" contra lo president Puigdemont e qualques ministres que l'acompanhan dins l'exili. Dins aquel sens, lo manifèst soslinha que los membres del govèrn catalan perseguit non an fach "qu'aplicar lor programa electoral dins lo pus grand respècte de las règlas democraticas".
 
Tanben planhon "la persecucion judiciària e las acusacions de delicte d'opinion, rebellion e incitacion a l'òdi infondadas a l'encontre dels cònsols màgers catalans, institutors, caps d'entrepresas e personalitats de la vida associativa", "la muselada autoritària dels mèdias e la pèrda de la libertat de premsa", "las pressions patidas per las entrepresas per que barren lor sèti social en Catalonha dins la tòca de destabilizar l'economia catalana", "l'installacion d'un govèrn non elegit al cap de Catalonha" e "l'illegalitat de las decisions presas pel govèrn espanhòl e pel Tribunal Constitucional".
 
Lo Manifèst de Tolosa se pòt signar sus Change.org.

 
 





 

Leave a Reply

Your email address will not be published. Required fields are marked *