Notícies

Vèto de França contra una moneda bèlga de 2 èuros perque commemòra la Batalha de Waterloo

La Moneda Reiala de Belgica aviá decidit e començat d’estampar una pèça de moneda de 2 èuros commemorativa de la Batalha de Waterloo. D’efièch ongan al mes de junh se celebrarà lo 200n anniversari de la desfacha de l’estat francés menat per l’emperaire Napoleon Ir contra una coalicion armada europèa compausada del Reialme Unit, de Prússia e dels Païses Basses. Aquesta batalha precipitèt lo fracatge del despòta francés.
 
Pels bèlgas sembla que la Batalha de Waterloo evòque puslèu un sit geografic ont se passèt un moment istoric decisiu pel continent. Aqueste sentiment es pas partejat per la diplomacia francesa que ten a còr qu’una pèça de moneda europèa non pòsca pas rampelar a l’ensemble dels païses europèus l’existéncia de l’imperialisme e del despotisme francés dins l’Euròpa de fa dos sègles. A mens que siá la commemoracion de la desfacha de l’imperialisme francés, valent a dire de la “grandeur”, qu’embarrasse l’estat francés.
 
Oficialament, la diplomacia francesa a demandat a las autoritats bèlgas que s’arrèste la fabricacion d’aquesta pèça al motiu que: “La circulacion de pèças correntas que pòrtan un simbolisme negatiu per una fraccion de la populacion europèa nos sembla prejudiciabla, dins un contèxte que los govèrns de la Zòna Èuro ensajan de renforçar l’unitat e la cooperacion a l’entorn de la moneda unica”. Aqueste vèto francés es una primièra dins l’istòria de la moneda unica europèa. L’istòria se sovendrà d’aquesta anecdòta coma una volontat de non pas tocar l’imatge de Napoleon que, d’un biais incomprensible, las autoritats francesas contunhan de velhar a sa veneracion.
 
Los bèlgas, obligats d’escampar las 175 000 pèças ja estampadas, an decidit de fargar de pèças de 3 o 5 èuros que pòdon pas far l’objècte d’un vèto. 
 
 
 
 

 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies