Ara es estat descobèrt que lo sòl lunar a de compausants actius que permeton de tresmudar de dioxid de carbòni en d’oxigèn e carburants divèrses. La trobalha es estada considerada tras qu’importanta pr’amor qu’ajudariá plan a explorar l’espaci, almens a bastir de colònias umanas sus la Luna. La descobèrta arribèt après l’analisi d’un exemple de tèrra lunara balhada a la Tèrra per la mission espaciala chinesa Chang’e-5.Lo cercaire Yingfang Yao, de l’Universitat de Nanquin e sos collègas an confirmat que se pòt aver d’oxigèn sonque amb de diòxid de carbòni expirat dels astronautas en mai de tèrra lunara, plan rica en fèrre e titani. Aqueles tres compausants bastarián per crear d’oxigèn en mai d’autres carburants per una futura colònia umana sus nòstre satellit.
De fotosintèsi extraterrèstra
Segon aquò, los umans pòdon far una mena de fotosintèsi extraterrèstra en utilizant aqueles compausants lunars coma catalizadors per electrolisar d’aiga (tanben lunara) en mai del dioxid de carbòni expirat dins l’alenament dels astronautas. Per ansin, aquel dioxid de carbòni serià reculhit e barrejat amb d’idrogèn extrach de l’aiga lunara per crear d’oxigèn, element clau per subreviure sus la Luna.
Lo procès tanben a coma resulta la creacion de metan, que tanben pòt èsser emplegat coma carburant. Aital, e sens utilisar d’energia exteriora (car sonque se fa servir la lutz del Solelh) los umans poirián produire d’oxigèn, fòrça important per una colònia umana lunara. Ara çò que vòl far aquela còla scientifica chinesa es provar se lo metòde fonciona per de missions lunaras chinesas avenidoiras.
“Totes los metòdes prepausats fins ara pels scientifics per crear d’oxigèn emplegavan totjorn de ressorsas d’energia exterioras, —çò diguèt Yingfang Yao—. Un exemple seriá la Mars Rover Perseverance de la NASA, qu’utilisèt de dioxid de carbòni per crear d’oxigèn, mas aviá una batariá nucleara terrèstra. Nosautres avèm capitat a crear d’oxigèn sens cap d’usatge d’energia exteriora”. (Legissètz la seguida).
Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.