32 candidats occitanistas se presentan jos l’etiqueta “Endavant” en tota Occitània a las eleccions legislativas de l’estat francés que se tendràn los 12 e 19 de junh que venon. Fan partida de la centena de candidats presentats pels diferents partits de Regions e Pòbles Solidaris. Los candidats son presents dins totas las regions: n’i a en Provença, Lemosin, Lengadòc, Bearn, Bigòrra, dins las Lanas, en Peiregòrd, Auvèrnhe e Velai. Son 16 femnas e 16 òmes de tot atge, de 19 ans a 75 ans.Jol lèma “democracia, ecologia, territòris”, la candidatura d’Endavant presenta de candidats d’originas divèrsas, qualques unes de militants de partits occitanistas e d’autres sens cap de carta. Los tèmas màgers del programa electoral son la question de la descentralizacion, la necessitat de promòure la lenga e la cultura occitanas, la lucha contra lo cambiament climatic, la reparticion de las riquesas, lo drech de viure dignament al país e e tot çò que pertòca la democracia e las libertats fondamentalas menaçadas.