Lo nòu govèrn grèc a tornat refusar ièr la proposicion de l’Eurogrop per prolongar lo pagament del deute del salvament economic, que ven caduc lo 28 de febrièr. Lo ministre grèc de las finanças, Giannis Varoufakis, a dich que l’ofèrta que li an fach los sieus omològs es “absurda e inacceptabla”. Varoufakis a avertit que, “quinas que sián las consequéncias”, pensa pas de passar “las linhas rojas” que Syriza a marcat e qu’acceptarà pas d’acòrdis que son “confuses per Grècia e per Euròpa”. Lo sieu omològ alemand, Wolfgang Schäuble, l’a acusat d’èsser un irresponsable: “Soi desolat pels grècs, mas an elegit un govèrn que se compòrta, per ara, d’un biais fòrça irresponsable”, çò a dich a la ràdio alemanda Deutschlandfunk.De son costat, lo ministre espanhòl de las finanças, Luis de Guindos, a avertit que Grècia deu tornar tot l’argent que li an prestat. “Per nosautres i a una linha roja que se pòt pas passar, e es que los prèstes los cal remborsar integralament”.
Tanben lo comissari europèu dels afars economics, Pierre Moscovici, a afirmat que la conclusion de la reünion de l’Eurogrop deu “prene en compte lo programa electoral de Syriza que los ciutadans grècs an votat, mas tanben los engatjaments de l’Union Europèa”
Los perilhs del desacòrdi
La majoritat dels ministres de l’Eurozòna insistissián ja la setmana passada per que lor omològ grèc, Giannis Varoufakis, demandèsse una prolongacion del salvament. Mas lo govèrn de Tsipras vòl pas alongar l’aplicacion de certanas condicions qu’an escandalizat la majoritat de la societat grèga.
Tsipras vòl un programa pont que meta fin a l’austeritat e qu’adocisca la carga del deute grèc mentre que se negòcia un nòu acòrdi amb los creditors en substitucion del programa actual. “Atendi una negociacion malaisida, mas ai fòrça fisança. Grècia serà, dins mièg an, un país entièrament diferent”, çò diguèt dimenge lo primièr ministre grèc.
Se i a pas cap d’acòrdi, i a la temor que Grècia intre en una crisi de crèdit que la poiriá daissar en defòra de l’Eurozòna.
Grècia se fisa de trobar un acòrdi dins los jorns venents
Pasmens, Varoufakis s’es dich fisançós sus la possibilitat de trobar un acòrdi. “Ai pas cap de dobte que dins las 48 oras venentas, Euròpa reüssirà a nos sometre [un document] per que comencem lo vertadièr trabalh e per qu’adobem un novèl contracte”, çò diguèt ièr lo ministre grèc als mèdias.