La Banca Centrala Europèa (BCE) a anonciat la decision drastica de barrar lo grifon de la liquiditat a las bancas grègas. Dins un comunicat emés ièr, la BCE diguèt que quitava d’acceptar coma gatge lo deute grèc dins sas operacions de finançament; doncas, acceptarà pas mai los bons emeses per Grècia, en fasent comprene qu’es pas possible d’assumir que lo plan de salvament del país s’acabe amb succès.La mesura obliga las bancas grègas a se finançar a travèrs de la Banca de Grècia, mejançant lo programa de liquiditat d’urgéncia. Atenas deu acceptar las condicions d’un nòu salvament se, coma o manifestèt lo ministre grèc de las finanças Gianis Varoufakis, a pas l’intencion de demandar una prolongacion del programa de salvament actual.
Lo govèrn grèc a assegurat que, malgrat la decision de la BCE, la liquiditat bancària es garentida. Lo pòrtavotz del govèrn, Gavriil Sakelaridis, a remarcat que “i a pas de rason de chepic” e que se tracta d’una pression politica de la part de la BCE sus lo procès de negociacion de Grècia amb los sieus sòcis. Pasmens, la borsa d’Atenas tombèt ièr d’un –6,90% al començament de la jornada.