Lo Collectiu Contra l’Islamofobia en França (CCIF) a anonciat son intencion d’”internacionalizar sas activitats” après que lo ministre francés de l’Interior, Gérald Darmanin, lo menacèt de dissolucion. L’endeman de l’òrre assassinat de Samuel Paty, lo ministre aviá considerat de dissòlver lo CCIF en l’acusant d’èsser “manifèstament implicat” dins crime. Lo CCIF reconeis que foguèt contactat pel paire de familha acusat d’aver orquestrat la campanha contra Paty sus Internet, mas aforís que faguèt pas res per manca de temps per verificar se l’afar èra dins son camp de competéncia, çò rapòrta Libération.Pel CCIF, la menaça del ministre es una vertadièra “denegacion politica e institucionala del racisme antimusulman”, e mai “adreiça un messatge terrible als ciutadans de confession musulmana”. En reaccion, lo CCIF a “activat un plan d’amplor que permet de desplegar una larga part de (sas) activitats a l’estrange”.
Segon lo director del CCIF, Jawad Bachare, l’internacionalizacion del collectiu respond a una volontat de seguretat. “Recebèm de menaças anonimas, de corrièrs, es impressionant”, çò ditz Bachare a Libération. Aquelas menaças, las amassan e las senhalan a las autoritats. “Cal que l’estat nos protegisca, mas al luòc d’aquò lo ministre de l’Interior nos bandís dins una vendeta”.
La setmana passada, lo ministèri de l’Interior aviá indicat que la procedura de dissolucion del CCIF requerís un decret en conselh dels ministres. Aquel decret se fondarà sus l’“apologia del terrorisme”, los “òdis identitaris e religioses” e “çò que tòca a l’òrdre public”.
How Muslims are targeted with Islamophobia in France: pic.twitter.com/5WL4bn6XiP
— CJ Werleman (@cjwerleman) October 28, 2020