Qual es Elisabeth Borne e per qué a pas convencut l’esquèrra ni los ecologistas?

Coma gaireben totes los mèdias del país o an raportat, lo president de França a nomenat Élisabeth Borne nòva primièra ministra. Aital Macron vòl far creire que lo nòu govèrn de França serà bastit per una persona “estacada a la question sociala, environamentala e productiva”, coma el meteis o aviá anonciat fa qualques jorns. E mai siá la primièra femna cap d’un govern francés dempuèi Édith Cresson en 1991,  son bilanç dins lo domeni ecologista es pas convençaire, segon Reporterre que publica una analisi ont lo mèdia la nomena “ministra especialista de las autoestradas”.
 
Tanben Greenpeace France manifèsta son scepticisme a prepaus del perfil ecologista de Borne. “Sa nominacion augura pas gaire d’espèr de veire França operar sa transicion ecologica coma l’urgéncia climatica li o obliga”, çò ditz dins un comunicat lo director general de l’organizacion ecologista, Jean-François Julliard.
 
D’autres elegits d’esquèrra an tanben mostrat lors resèrvas e criticas. Una deputada de La França Insomesa, Mathilde Panot, la qualifica dins un tweet de “ministra fantauma de l’ecologia”, del temps que l’ecologista Sandrine Rousseau a detalhat que dins son cort mandat se respectèt pas la convencion ciutadana sul clima, se mantenguèt l’avantatge fiscal sus l’òli de palma e que quitament lo Conselh d’Estat foguèt condemnat per la pollucion de l’aire.
 
 
Poliministra polemica amb Macron
 
Jos la presidéncia de Macron, Borne foguèt ministra dels transpòrts, ont afrontèt de desfises importants coma la creacion d’un impòst ecologic suls bilhets d’avion o la promocion de la bicicleta. Totun, la reforma de l’SNCF congreèt la cauma del sector mai importanta dels darrièrs decennis. Fin finala, Borne capitèt a far avançar sa reforma malgrat las protèstas.
 
Pus tard, foguèt nomenada ministra de la transicion ecologica, ont passèt un an abans abans de venir ministra del trabalh, de l’emplec e de l’insercion: tanben i defendèt de reformas polemicas coma la de l’assegurança caumatge e la de las pensions de retirada, qu’es pas encara menada a bon tèrme.
 
 
En politica dempuèi los ans 1980
 
Nascuda a París fa 61 ans, Borne es filha d’un josieu d’origina russa que se refugièt en França e que foguèt deportat dins un camp de concentracion en 1942, pendent lo regim de Pétain. Engenhaira de l’Escòla del Pont, se formèt a l’Escòla Politecnica. Comencèt de frequentar la politica a la mitat dels ans 1980 coma conselhièra de qualques ministèris e, a partir dels ans 1990, coma conselhièra del Ministèri de l’Educacion. Vendriá pus tard presidenta del Ret de Transpòrts Publics de París, puèi responsabla de l’urbanisme dins la capitala francesa, abans d’èsser nomenada prefècta de la region de Peitau-Charantas e del departament de Vinhana.

 
 
 

 

 

La justícia bèlga a rebutat tornarmai e definitivament l’extradicion de Valtònyc

La justícia bèlga a rebutat tornarmai e definitivament l’extradicion del cantador malhorquin de rap, Josep Miquel Arenas, de nom d’artista Valtònyc. La Cort d’Apelacion de Gant rebutèt dimars passat pel segond còp l’extradicion de l’artista après que se foguèt ordenat un segond jutjament. Lo procuraire que defend los interèsses d’Espanha aviá per darrièr recors de far apelacion a la Cort de Cassacion de Belgica, mas lo ministèri public espanhòl i a renonciat. “Es complicat de creire que presenten un recors après que doas corts diferentas an rebutat totes los arguments”, çò aviá declarat l’avocat Gonzalo Boye.
 
De son latz, lo musician diguèt als mèdias qu’el aviá causit l’exili en Belgica car sabiá qu’aquí poiriá defendre sos dreches fondamentals. “Arribèri aicí a l’atge de 24 ans e n’ai ara 28. Lo temps m’a donat rason”, çò diguèt en tot mercejar lo mond pel sosten qu’a recebut dempuèi que quitèt Malhòrca a causa de la persecucion del sistèma judiciari espanhòl. “Me soi pas jamai sentit tot sol, e aquò es estat fòrça important”, çò a precisat. Enfin, visiblament esmogut, concluguèt: “Ara ai enveja de viure.”
 

  
En decembre passat, la Cort d’Apelacion de Gant decidiguèt qu’extradiriá pas Valtònyc, en considerant que lo rapaire exercissiá la libertat d’expression quand cantava las cançons per las qualas la justícia espanhòla lo condemnèt. Ça que la, lo procuraire bèlga presentèt un recors dins lo qual disiá que lo tribunal aviá pas analisat se lo delicte que l’acusa la justícia espanhòla, d’injúrias e de menaças a la corona, se poirián pas comparar en Belgica amb d’injúrias a de particulars o d’otratges a deputats, minitres e foncionaris. La Cort de Cassacion acceptèt lo recors e lo jutjament s’es tornat far.
 
 
Un combat de quatre ans d’exili
 
Espanha aviá doncas demandada l’extradicion automatica del rapaire per un pretendut delicte d’enaurament del terrorisme pr’amor de las paraulas d’una cançon contra lo rei emerit, Joan Carles Ir. Mas, segon la legislacion europèa, aquela mena d’extradicion es solament permesa per de crimes punits dins l’estat en question amb almens tres ans de preson. Valtònyc l’avián condemnat a dos ans de preson segon la lei espanhòla de 2012, mas quand se depausèt lo mandat d’arrèst europèu, lo còde penal aviá aumentada la pena per aquel delicte après la reforma facha en 2015. En novembre passat, l’avocata generala de la cort luxemborgesa aviá ja avisat qu’Espanha ne podiá pas reclamar l’extradicion amb un còde penal posterior als faches.
 
En setembre de 2019, la Cort de Justícia de l’Union Europèa considerèt que l’estat espanhòl podiá pas aplicar lo còde penal retroactivament per demandar l’extradicion automatica del cantador. Lo procès contra el passèt entre las mans dels jutges bèlgas, çò qu’obliguèt la justícia de Belgica de s’interrogar sus sa legislacion.
 
En 2018, la justícia bèlga aviá ja refusada l’extradicion del cantador. Segon lo tribunal de Gant, las acusacions espanhòlas de “menaças, enaurament del terrorisme e injúrias a la corona” èran pas cap de delicte ni en Espanha ni en Belgica. Lo ministèri public espanhòl faguèt un recors a la cort d’apelacion que foguèt rebutat.

L’afar Valtònyc a fach cambiar la Constitucion de Belgica
 
L’afar Valtònyc a quitament obligat la justícia bèlga de s’interrogar sus una lei de 1847 qu’èra tombada dins la desmembrança. En octòbre passat, la Cort Constitucionala bèlga decidiguèt qu’aquela lei non s’ajustava pas a la legislacion actuala e al drech internacional dels dreches umans. A mai, èra en contradiccion amb l’article 19 de la Constitucion que garentís la libertat d’exprimir d’opinions sus totes los subjèctes. Pels jutges bèlgas, aquela anciana lei protegissiá “la reputacion del rei mai que la de las autras personas”.

 

 

Lo jove tuaire de Buffalo cresiá a la teoria del grand remplaçament

Lo jove tuaire Payton Grendon, qu’assassinèt una desena de personas dins un supermercat a Buffalo (Estats Units) dissabte passat, cresiá a la teoria racista del grand remplaçament, çò rapòrta Newsweek. Aquela teoria conspirativa, que nasquèt en França,  assegura que los europèus blancs crestians son remplaçats per de pòbles non europèus, non blancs o non crestians. L’idèa a ganhat de popularitat als Estats Units, ont ara se’n critica la difusion que ne fa la congressista trumpista Elise Stefanik, e arriba quitament sus las televisions generalistas.
 
Payton Grendon a 18 ans, es un afogat de las teorias racistas conspiracionistas e planifiquèt son crime en s’inspirant del chaple de març de 2019 a Christchurch, en Nòva Zelanda. Amb aquela influéncia ideologica, preparèt amb suènh son crime e lo retransmetèt en dirècte sus Twitch ont daissèt un manifèst supremacista de 180 paginas.
 
Grendon tuèt dissabte 10 personas e ne nafrèt d’autras 3, dont 11 èran afroamericanas. Coma l’assassin de Nòva Zelanda, lo canon de son fusilh portava un messatge racista escrich amb de letras bancas. Ara es detengut e serà jutjat per almens 10 assassinats al primièr gra. Es plan probable que siá embarrat per la rèsta de sa vida. Aviá pas cap de passat criminal e lo fusilh l’aviá crompat legalament.
 
Coma se passa après cada chaple d’aquela sòrta, se reviu als Estats Units lo debat sul contraròtle de las armas. Aqueste còp, totun, tanben se met en question las teorias racistas conspiracionistas que los difusan d’elegits e de mèdias de massa.

 

The Buffalo Killer’s Great Replacement Theory, and the Truth About Tucke… https://t.co/ndlGICnzJ1 via @YouTube

— JB (@Desertpuma) May 16, 2022

 

NEW: A mass shooter in Buffalo, NY who killed at least 10 people had posted a manifesto online espousing the White Replacement Theory, per @BNONews.

White Replacement Theory has been long promoted and championed by Tucker Carlson on Fox News.pic.twitter.com/LaO82WpzfH

— Brian Tyler Cohen (@briantylercohen) May 14, 2022

 

Hey New York – remember consequences?@EliseStefanik bought Facebook ads pushing ‘great replacement theory’ claiming white people are intentionally being replaced by migrants.

IMO, her words encouraged hate and division and the type of violence we witnessed in Buffalo today. pic.twitter.com/YNeljukxkR

— Don Winslow (@donwinslow) May 15, 2022

 

David Dufresne : ”On a aujourd’hui un pouvoir médiatique qui roule totalement pour l’extrême-droite. Aujourd’hui on peut dire à cette antenne ’grand remplacement’ sans guillemets.”#Buffalo https://t.co/4NbLC6DmkW

— Bérénice (@berenyce76) May 15, 2022

 

Rugbi de XIII: lo Grand Uèit de la Prima del XIII vos espèra a Narbona

Aquesta dimenjada, uèit finalas se jogaràn a Narbona per aquelas jornadas entitoladas «la Prima del XIII»: sièis al Pargue dels Espòrts e de l’Amistat: dissabte de vèspre, las finalas d’Elèit 2 e Elèit 1 femenina (en Elèit 1, novèl afrontament Divessas Catalanas-l’Escura) e dimenge: 4 finalas (los U15 a 10h; los U17 a 11h; los U19 Tolosa contra Catalans-Sant Estève a 13h, e la finala d’Elèit 1 entre Carcassona e Limós a 15h30). Las doas finalas de XIII-cadieral se debanaràn dissabte en fin de vèspre dins la sala de l’Arena.

Elèit 1: Carcassona o Limós: per quala esquipa lo bloquièr?
 
A Carcassona e Limós, es lo temps dels preparatius. De las esquipas de segur amb d’entraïnaments e d’analisis vidèo per veire cossí contrar lo jòc de l’adversari. Los desplaçaments en bus se preparan, las saquetas ajudaràn los sostens a téner còp, las musicas seràn de la partida, mas dimenge de ser, ont serà lo bloquièr, a Carcassona o a Limós? Nos azardarem pas a faire de pronostic. Just, desirar de viure una granda finala.
 
En Elèit 2, se jogava los barratges: dissabte, Vilagalhenc-Argon dominèt l’Escura 49-12  e dimenge Illa passèt l’obstacle Entraigas: 34-16. Tres formacions catalanas son en mièja finala qu’opausaràn dins una quinzenada Baó e la formacion de Cabardés d’un caire e Pià e Illa d’autre caire.
 
En U19, la finala de la Copa Nitard se jogarà entre los catalans, qu’an eliminat Tolosa en mièja finala 20-18, e Carcassona qu’es anat quèrre la qualificacion a Selon de Provença 40-28.
 
En Nacionala, la finala opausarà Tonens e Realmont, doas esquipas qu’an una longa istòria tretzista.
 
 
Superliga: las cargas de l’oncle Sam
 
Dissabte, los Dragons recebián a Brutus los Lops de Warrington. La partida foguèt equilibrada fins a la 55a minuta: 8-8, mas lo final virèt al festenal catalan amb cinc ensages marcats, dos sortits de doas cargas fenomenalas de Sam Kasiano. Amb aquesta victòria 40-8, los catalans s’installan a la segonda plaça del classament de la Superliga.
 
Dimenge, a Ernèst Wallon, lo Tolosa Olimpic se balha de rasons d’esperar en signant sa segonda victòria de la sason e contra un adversari dirècte pel manten: Wakefield. Victòria occitana: 20-14 .
 
Divendres, los tolosans jogaràn a Huddersfield. Desplaçament tanben pels catalans: seràn opausats a Hull KR dimenge a una ora e mièja del vèspre.
 
Autra bona novèla pels Sang e Aur: la qualificacion de la formacion dels Andidragons per la finala de la Challenge Cup de XIII-cadieral. Victòria 30-6 fàcia a Wigan e finala de jogar lo 25 de junh contra Leeds.
 
 
NRL: las Pantèras an recuperadas las urpas
 
En Austràlia, las 8 partidas del Magic Round se joguèron a Brisbane de divendres a dimenge. Cèrtas partidas foguèron plan disputadas: victòria dels Lapinons fàcia als neozelandeses 32-30, dels Titans fàcia a Sant Jòrdi 20-16 o dels Pols contra las Anguialas: 31-24 .
 
D’autras se revelèron mai desequilibradas: Brisbane ganha 38-0 contra Manly  e los Vaquièrs dominan los Tigres: 36-12.
 
La setmana passada, Penrith aviá daissada la primièra plaça del classament a Melbourne, mas dissabte la tornèt prene amb una larga victòria 32-6 sul primadièr efemèr.
 
 
 
 
Alan Roch
 
 

 

 

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies