Turin aculhirà uèi la gala finala d’ongan del concors de l’Eurovision amb una novetat estonanta: la cançon que representa França es cantada en breton. Entitolada Fulenn (beluga) la cançon combina los mites cèltas de Bretanha amb de nòus ritmes electronics e l’interprètan lo cantador Alvan e lo trio Ahez. Durant la seleccion estatala que se faguèt en març passat, Fulenn obtenguèt lo vòte del public e de la jurada. Se passèt pas la meteissa causa amb la proposicion en galèc que deviá representar Espanha, qu’obtenguèt lo vòte del public mas non pas lo de la jurada. Espanha presentarà una cançon en espanhòl.Es pas lo primièr còp que França es representada per una cançon en breton. En 1996 o faguèron Dan Ar Braz e l’Héritage des Celtes amb la cançon Diwanit bugale. De remembrar qu’Ucraïna ganhèt lo festenal europèu de la cançon en 2016 amb una cançon en anglés e tatar, qu’evocava la tragèdia viscuda pels tatars de Crimèa a l’epòca d’Stalin. Crimèa foguèt annexada a Russia en març de 2014.
Ongan, lo concors de l’Eurovision fa sa 66a edicion a Turin. La granda gala començarà a 21h al Palasport Olimpic de la capitala de Piemont e se poirà seguir sus las principalas cadenas del Mond.